Cúrsa Ceoil & Cumadóireachta do Dhéagóirí 13-17
Síle Denvir
Colm Ó Foghlú
Aoife Ní Bhriain
Aisling Ní Neachtain
Steve Cooney
Tá Ensemble na nÓg dírithe ar cheoltóirí óga cumasacha (13-17) a bhfuil suim acu a gcuid ceoil agus cruthaitheachta a fhorbairt.
Tá scoth na gceoltóirí agus áisitheoirí gairmiúla páirteach sa chlár seo, ina measc:
Síle Denvir, Colm Ó Foghlú, Aoife Ní Bhriain & Aisling Ní Neachtain
Sprioc an chúrsa seo ná grúpa ceoltóirí óga a thabhairt le chéile ó cheann ceann na tíre agus clár oiliúna a chur ar fáil dóibh i réimse an cheoil agus na cumadóireachta chun a gcruthaitheacht agus a bhféinmhuinín a spreagadh. Beidh béim ar leith ar fhorbairt phearsanta an duine agus clár cuimsitheach imeachtaí sóisialta lárnach tríd.
Beidh ceardlanna praiticiúla i gceist i gcúrsaí ceoil, amhránaíochta, cumadóireacht, comhcheol, taibhiú an cheoil agus cóiriú an cheoil. Beidh na daoine óga ag cumadh a gcuid saothair féin mar chuid den Ensemble agus iad ag obair le chéile chun na saothair seo a chur i láthair ag coirmcheoil speisialta i Stiúideo Cuan i Mí na Samhna.
Beidh aoi-áisitheoirí ag tacú leis an Ensemble le linn na tréimhse seo freisin, ina measc:
Steve Cooney, Sinéad Hayes & Cormac McCarthy
Sinéad Hayes
Cormac McCarthy
Spriocdháta Iontrála: 17:00 Dé hAoine 5 Meán Fómhair
Ceardlanna / Próiseas Roghnaithe
Reachtálfar dhá cheardlann earcaíochta i Mí Meán Fómhair le baill Ensemble na nÓg a roghnú.
Is ceardlanna lae a bheas anseo ó 1000 go 1630 ar an Satharn 13 & 27 Meán Fómhair.
Glacfar le uasmhéid de 30 ceoltóir óg le bheith páirteach sna ceardlanna earcaíochta seo.
Tá fáilte roimh gach uirlis agus gach saghas ceol.
Tá fáilte roimh amhránaithe aonair freisin.
Is gá iarratas a dhéanamh chun áit a bhaint amach ar na ceardlanna earcaíochta seo.
Tá an fhoirm iarratais thíos.
Is gá físeán a cheangal leis an iarratas don déagóir ag seinm uirlis nó ag canadh amhrán - le barúil a thabhairt dúinn do do chumas ceoil. Molann muid go roghnódh tú píosa ceoil nó amhrán a thaitníonn go mór leat agus b'fhiú a insint dúinn ag tús an fhíseáin cén fáth gur roghnaigh tú an píosa ceoil nó amhrán áirithe sin. Ná bíodh an físeán níos faide ná 3 nóiméad le do thoil.
Róghnófar na hiarrathóirí rathúla bunaithe ar an t-eolas a chuirfear ar fáil sa bhfoirm iarratais.
Cuirfear iarrathóirí ar an eolas ar an Luan 8 Meán Fómhair.
Is iad Áisitheoirí Ensemble na nÓg agus foireann Stiúideo Cuan a roghnóidh na hiarrathóirí rathúla do na ceardlanna Earcaíochta.
Is gá dóibh siúd a roghnófar do na ceardlanna earcaíochta a bheith i láthair don dhá cheardlann lae a bheas ar bun ar an 13 & 27 Meán Fómhair i Stiúideo Cuan.
Beidh béim ar obair ghrúpa le linn na gceardlanna earcaíochta seo.
Is meascán de cheardlanna ceoil, cumadóireachta agus amhránaíochta a bheas i gceist.
Is i bhfóram thacúil agus spraoiúil a reachtálann Stiúideo Cuan gach gné d’ár gclár imeachtaí don óige.
Beidh béim i gcónaí ar dhaoine óga a chumasú lena gcruthaitheacht a fhorbairt in atmaisféar thaitneamhach a bhfuil meas iomlán ar an duine i gcónaí.
Tar éis na ceardlanna earcaíochta, roghnóidh na háisitheoirí suas le seisear déag ceoltóirí le bheith páirteach in Ensemble na nÓg an Fómhar seo.
Seo a leanas na critéir measúnaíochta a bheas san áireamh sa phróiseas roghnúcháin seo:
Cumas agus caighdeán ceoil an déagóra.
Rogha leathan uirlisí.
Cothromaíocht inscne.
Ionadaíocht leathan tíreolaíoch.
Cumas caidrimh agus comhoibriú an déagóra.
Ensemble na nÓg
Tiocfaidh an seisear déag a bheas páirteach in Ensemble na nÓg le chéile i Stiúideo Cuan ar na dátaí seo a leanas:
Dé Sathairn 11 Deireadh Fómhair
Dé Sathairn 25 Deireadh Fómhair
Dé Sathairn 15 Samhain
Beidh an Ensemble ag obair, le tacaíocht ó na háisitheoirí, le saotha(i)r nua ceoil a chruthú a sheinnfear go poiblí don chéad uair i Stiúideo Cuan ar na dátaí seo a leanas:
Dé Sathairn 29 Samhain
Dé Domhnaigh 30 Samhain
Beidh Ensemble na nÓg ag cleachtadh i rith an lae ar na dátaí thuas agus coirmcheoil acu an dá oíche sin. Cuirfidh na coirmeacha ceoil seo clabhsúr le Ensemble na nÓg do 2025.
Eolas Breise
Níl aon chostas ar an gcúrsa ACH tá sé riachtanach go mbeadh rannpháirtithe i láthair ag na ceardlanna ar fad.
Beidh an cúrsa ar bun ar na dátaí atá luaite thuas i Stiúideo Cuan sa Spidéal, H91FT67.
Beidh ceardlanna ceoil agus obair ghrúpa ar bun i ngach seisiún agus clár imeachtaí sóisialta mar chuid lárnach den togra.
Úsáid foirm amháin do gach déagóir. (má tá níos mó ná déagóir amháin sa teaghlach ag iarraidh iarratas a dhéanamh)
Is í an Ghaeilge teanga oibre Ensemble na nÓg agus ní mór d’iarrathóirí Gaeilge a bheith ar a dtoil acu le bheith páirteach.
Foilsiú an tSaothair
Foilsíonn Stiúideo Cuan saothar ó gach rannpháirtí nó grúpa rannpháirtithe lena gcruthaitheacht agus a ngaisce a cheiliúradh. Is leis na húdair cóipcheart a saothar ón gcúrsa Ensemble na nÓg agus cead tugtha do Stiúideo Cuan an obair chruthaíoch a úsáid in aon cheann dá gcuid foilseachán, in ábhar bolscaireachta agus láithreáin gréasáin.
Grianghraif / Scannánaíocht
Tógann muid pictiúir do na rannpháirtithe i mbun oibre le cur ar ár láithreán gréasáin, na meáin shóisialta agus ábhar eile bolscaireachta faoinár gcuid oibre. Cuirfear gach rannpháirtí san áireamh. Tabhair faoi deara gur riachtanas é seo le bheith páirteach agus nach bhfuil sé roghnach.
